नणदोई के गीत मालवी लोकगीत Nandoi Geet Malvi Lokgeet lyrics in Hindi

 अगवाड़े तो बई जी रा बीरा / मालवी

अगवाड़े तो बई जी रा बीरा

पिछवाड़े नणदोई जी

हिरती-फिरती बातां पूछूँ

के लाया नणदोई जी

जीमवाने घेवर लाया

खेलवाने चौपड़ जी

ओड़वाने सालू लाया

ओड़ी सालाहेली जी

बिछिया घड़ावे म्हारा सगा नणदोई जी

अनबट की साई उनका साका से लगाई जी

होजी नणदोई आया पावणा / मालवी

होजी नणदोई आया पावणा

तमारी कई-कई करूँ मनवार

नणदोई जी प्यारा आयाजी म्हारा यां पावणा

होजी तातो पाणी तो धरवाई देती

ना पीड़ो गयो परदेस नणदोई जी

रोटी तो बणाय देती

चूले लगाई गार नणदोई जी

झारी तो भरवाया देती

दासी रो दूखे हाथ नणदोई जी

ढाल्यो तो ढ़लवाय देती

म्हारा बाईजी गया रिसाय नणदोई जी

होजी ओरा आजो पावणा

तमारी फिर के करांगा मनवार

नणदोई जी प्यारा आयाजी म्हारा यां पावणा

कठड़े से आया हो राज / मालवी

कठड़े से आया हो राज

कठड़े से आया म्हारा सगा नणदोई जी

प्यारा नणदोई जी कठड़े से आया हो राज

म्हारा सगी साका हेली जी

प्यारी साला हेली जी आया हो राज

पाणीड़ा समायो हो राज

पाणीड़ा समायो म्हारा सगा नणदोई जी

प्यारा नणदोई जी पाणी समोया हो राज

अब हम न्हावां हो राज

अब हम न्हावां म्हारा सगा नणदोई जी

प्यारी सलाहेली जी अब हम न्हावां हो राज

भोजन परोस्या हो राज

भोजन परोस्या म्हारा सगा नणदोई जी

प्यारा नणदोई जी थाल परोसी हो राज

अब हम जीमां हो राज

अब हम जीमां म्हारी सगी सालाहेली जी

प्यारी सालाहेली जी, अब हम जीमां हो राज

झारी भराई हो राज

झारी भराई म्हारा सगा नणदोई जी

प्यारा नणदोई जी, झारी भराई जी

अब हम पीवां हो राज

अब हम पावां हमारी सगी सालाहेली जी

प्यारी सालाहेली जी अब हम पावां हो राज

चौपड़ रलाई हो राज

चौपड़ रलाई म्हारा सगा नणदोई जी

प्यारा नणदोई जी चौपड़ रलाई हो राज

अब हम खेलां हो राज

अब हम खेलां म्हारी सगी सालाहेली जी

प्यारी सालाहेली अब हम जीतां हो राज

ढोल्यो ढलायो हो राज

ढोल्यो ढलायो म्हारा लगा नणदोई की

प्यारा नणदोई जी ढ़ाल्यो ढ़लायो हो राज

अब हम पौड़ां हो राज

अब हम पौड़ां म्हारी सगी साकाहेली जी

प्यारी साकाहेली अब हम पौडां हो राज

वे तो साला बेणोई दोई बागां में जाय / मालवी

वे तो साला बेणोई दोई बागां में जाय

वे तो पाटे नी चाले

जमई जी ऊबट रस्ते जाय

जमई खे कांटो भाग्यो जाय

साला पूछे बेणोई अब कैसो हो बनी

साला अब तो हमारा प्यारा जीव की पड़ी

वे तो साला बेणोई दोई दातण करने जाय

वे तो दातण नी तोड़े

जमई जी डाल मरोड़े जाय

जमई जी उलझया-उलझया जाय

साला पूछे बेणोई कैसी हो बणी

साला अब तो हमारा प्यारा जीव की पड़ी

वे तो न्हाई नी जाये

जमई जी ऊँडा गीता खाय

साला पूछे बेणोई कैसी हो बणी

साला अब तो हमारा प्यारा जीव की पड़ी

वे तो साला बेनाई दोई नीम वा ने जाय

वे तो जीयी नी जाय

जमई जी आखा लाडू खाय

साला पूछे बेणोई कैसी हो बणी

साला अब तो हमारा प्यारा जीव की पड़ी।